ഏട്ടത്തിയമ്മ.

എടാ അനൂപേ നീ എന്തടുക്കുവാ?

ഒന്നുമില്ല ഏടത്തീ, ഞാൻ വെറുതെ ഇരിക്കുവാ.,
ഇപ്പൊ ദിവസംതോറും നിന്റെ മൊബൈൽ ഉപയോഗം കൂടുന്നുണ്ടല്ലോ, ഏട്ടൻ വരട്ടെ ഞാൻ പറയുന്നുണ്ട്,

പ്ലീസ് ഏട്ടത്തി, ഏട്ടനോട് പറയല്ലേ...

ഏട്ടത്തി,
എന്റെ എല്ലാമെല്ലാം ആണ്, ഒരു അമ്മയായി, ചേച്ചിയായി, അനുജത്തിയായി അങ്ങനെ എല്ലാംതന്നെ ഏട്ടത്തിയമ്മയാണ്...

എന്റെ പത്താം വയസിലാണ് ഒരു കാറപകടത്തിൽ എന്റെ അച്ഛനും അമ്മയും മരിക്കുന്നത്, അതിനുശേഷം എന്റെ എല്ലാം ഏട്ടന്‍ ആയിരുന്നു, ഏട്ടന് എന്നേക്കാൾ പത്ത് വയസ്സ് കൂടുതല്‍ ആണ്, അച്ഛന്‍റെയും അമ്മയുടെയും മരണശേഷം എന്നെ വളർത്തിയതും പഠിപ്പിച്ചതും എല്ലാം ഏട്ടനാണ്. ഏട്ടനു ഞാനും എനിക്ക് ഏട്ടനും, അതായിരുന്നു ഞങ്ങളുടെ ലോകം.

അങ്ങനെയുള്ള ഞങ്ങളുടെ ജീവിതത്തിലേക്കാണ് ഐശ്വര്യത്തിന്റെ പ്രതീകമായി ഏട്ടത്തിയമ്മ കടന്നുവന്നത്...

രണ്ട് വർഷം മുമ്പ്,..
അന്നൊരു ഞായറാഴ്ചയായിരുന്നു, ഒരു ബന്ധുവിന്റെ വീട്ടിലെ കല്ല്യാണം കൂടാനായി ഞാനും ഏട്ടനും കൂടി പോയി, കല്ല്യാണത്തിന് സദ്യ വിളമ്പുന്നതിനിടയിലാണ് എന്റെ കണ്ണുകള്‍ ഒരു മുഖത്തിൽ ഉടക്കിയത്.. ഒരു 19 വയസ്സ് പ്രായം തോന്നിക്കുന്ന ഒരു ദേവത. , ഞാൻ മനസ്സില്‍ ഉറപ്പിച്ചു ഇത് തന്നെയാണ് എന്റെ ഏട്ടത്തിയമ്മ എന്ന്..

കല്ല്യാണം കഴിഞ്ഞു പോകാന്‍ നേരം ഞാൻ ആ ദേവതയെ തിരയുകയായിരുന്നു, പക്ഷെ നിർഭാഗ്യവശാൽ അന്ന് കാണാന്‍ കഴിഞ്ഞില്ല, ഞാനാകെ മൂഡോഫ് ആയി,
വീട്ടിലോട്ടുള്ള യാത്രയിൽ ഞാൻ ഏട്ടനോട് ഒന്നും മിണ്ടാതെ ആ ഏട്ടത്തിയമ്മയെ കുറിച്ച് ഓർത്തുകൊണ്ടിരിക്കുകയായിരുന്നു...

എന്താടാ നിനക്കെന്താ പറ്റിയത് എന്ന എന്റെ ചേട്ടന്‍റെ ചോദ്യത്തിന് ഒന്നുമില്ല എന്ന മറുപടിയിൽ ഒതുക്കി വീട്ടിലെത്തി, ഏട്ടൻ ചോദ്യം വീണ്ടും ആവർത്തിച്ചപ്പോൾ എല്ലാം ഏട്ടനോട് പറഞ്ഞു , എല്ലാം കേട്ടുകഴിഞ്ഞ് ഏട്ടൻ ചിരിയോടുചിരി...
"നിന്നോടാരാ എനിക്കിപ്പം പെണ്ണ് നോക്കാന്‍ പറഞ്ഞെ?"

"അതല്ല ഏട്ടാ, എനിക്കൊരു ഏട്ടത്തിയമ്മയെ വേണം, അതിനാണ്.."

"നോക്കാം അനൂ"

ഒരാഴ്ചക്ക് ശേഷം ഒരു ദിവസം അമ്പലത്തിൽ വെച്ച് വീണ്ടും ഞാൻ ആ ദേവതയെ കണ്ടു, അതെ എന്റെ ഏട്ടത്തിയമ്മയെ...

ഞാൻ അവരുടെ അടുത്ത് ചെന്നു, വിറക്കുന്നുണ്ടെങ്കിലും എങ്ങനെയോ പറഞ്ഞൊപ്പിച്ചു..

"ചേച്ചീ, ചേച്ചിക്കെന്റെ ഏട്ടത്തിയമ്മയാവാൻ കഴിയുമോ?"

ഇവനെന്താണ് ഈ ചോദിക്കുന്നത് എന്ന അർത്ഥത്തിൽ അവരെന്നെയൊന്ന് നോക്കി,

"നീ എന്താ ഉദ്ദേശിച്ചത്? എനിക്ക് മനസിലായില്ല"

" എന്റെ വീട്ടില്‍ ഞാനും എന്റെ ചേട്ടനും മാത്രമാണുള്ളത്, അമ്മയും അച്ഛനും എന്റെ പത്താമത്തെ വയസിൽ കാറപകടത്തിൽ മരണപ്പെട്ടു, ഇപ്പോൾ എനിക്ക് ഏട്ടനും മാത്രമേ ഉള്ളൂ, എനിക്ക് ചേച്ചിയെ ഒരുപാട് ഇഷ്ടമായി, ചേച്ചി എന്നും എന്റെ കൂടെ ഉണ്ടാവണം എന്ന് ഞാൻ ആഗ്രഹിക്കുന്നു ഒരു അമ്മയായി, സഹോദരിയായി അതാണ് ഞാൻ ഇങ്ങനെ ചോദിച്ചത്, തെറ്റാണെങ്കിൽ ക്ഷമിക്കണം"

"ഇങ്ങനെ ഒരു അനുജനെ കിട്ടാന്‍ ഞാൻ എന്ത് പുണ്യാ ഈശ്വരാ ചെയ്തത്, ഏതായാലും നീ ഏട്ടനേയും കൂട്ടി വീട്ടിലോട്ട് വാ"

അങ്ങനെ ഏട്ടനും ഏട്ടത്തിയും സംസാരിച്ചു, ഏട്ടൻ ഒരൊറ്റ കാര്യമേ ഏട്ടത്തിയോട് പറഞ്ഞുള്ളൂ, ഇവൻ എന്റെ അനുജന്‍ മാത്രമല്ല, മകൻ കൂടിയാണ്... അതുപോലെ അവനെ നോക്കണം എന്ന്..

പെട്ടെന്നു തന്നെ ഏട്ടന്റെയും ഏട്ടത്തിയുടെയും വിവാഹം ലളിതമായ രീതിയില്‍ നടന്നു...

വീട്ടിലേക്ക് വന്ന ഏട്ടത്തിയെ നിലവിളക്ക് എടുത്ത് സ്വീകരിക്കുന്ന ചുമതല എനിക്കായി...

" ഏട്ടത്തീ, ഇവിടെ ഈ നിലവിളക്കെടുത്തു തരാന്‍ പെണ്ണുങ്ങള്‍ ആരുമില്ല, തൽക്കാലം ഇത് വാങ്ങി ഇനിമുതൽ നിലവിളക്ക് കത്തിക്കാനുള്ള അവകാശം സ്വീകരിച്ചാലും"

അതിനു മറുപടിയായി എല്ലാവരും ഒന്ന് ചിരിച്ചു...

അന്നുമുതല്‍ ഇന്നുവരെ എനിക്കെന്‍റെ അമ്മയും ചേച്ചിയും അനിയത്തിയും ഏട്ടത്തിയമ്മയാണ്...

ഇപ്പോള്‍ എനിക്കൊരു ചെറിയ പനി വന്നാല്‍ എന്നെക്കാളും ചേട്ടനെക്കാളും വേവലാതി ഏട്ടത്തിയമ്മക്കാണ്,

ഏട്ടൻ എപ്പോഴും തമാശയായി പറയും ഇവൾക്ക് എന്നെക്കാള്‍ സ്നേഹം അനിയൻകുട്ടനോടാണെന്ന്, അപ്പോള്‍ ചേച്ചി പറയും അവൻ എന്റെ സ്വന്തം അനിയനും മകനുമാണെന്ന്...

"എനിക്കൊരു അമ്മയുടെ വാത്സല്യം, ചേച്ചിയുടെ കരുതൽ, അനുജത്തിയുടെ കുറുമ്പ് എല്ലാം എന്റെ ഏട്ടത്തിയമ്മയിൽ നിന്ന് ലഭിക്കുമ്പോൾ ആ സ്നേഹത്തിന് പകരം വെക്കാന്‍ എന്റെ കയ്യില്‍ ഒന്നുമില്ല, ഈ ജന്മമല്ലാതെ...."

"എന്താടാ സ്വപ്നം കാണുന്നത്, ഏതെങ്കിലും പ്രേമത്തിൽ പെട്ടോ"

ഏട്ടത്തിയുടെ ചോദ്യം എന്നെ ഓർമ്മകളിൽ നിന്നും ഉണർത്തി...

" അങ്ങനെ ഒന്നുമില്ല ഏടത്തി, ഏടത്തിയും ഏട്ടനും ഇഷ്ടപ്പെടുന്ന പെണ്ണിനെ മാത്രം മതിയെനിക്ക് "

ഒരു തലോടലിൽ മറുപടി നൽകി ഏട്ടത്തി അടുക്കള ലക്ഷ്യമാക്കി നടന്നു...